«ԿԵՏ» միջազգային բարեգործական հիմնադրամը շարունակում է նշանակալի աջակցություն տրամադրել Հայաստանի դպրոցներին՝ ֆինանսավորելով և իրականացնելով դպրոցական կրթության արդիականացմանն ու ուսումնական գործընթացի որակի բարձրացմանն ուղղված ծրագրեր։
Այս նպատակով փետրվարին հիմնադրամը «Վիզուալ Հայաստան» զարգացման հիմնադրամի հետ համատեղ ֆինանսավորել է երեք ծրագիր։ Նոր սերնդի ինտերակտիվ հեղուկբյուրեղային սմարթ-էկրաններ են նվիրաբերվել Երևանի Ա․ Միկոյանի անվան հ․ 166 հիմնական դպրոցին, ինչպես նաև Արթիկ համայնքի Հառիճ և Պեմզաշեն գյուղերի միջնակարգ դպրոցներին։ Դպրոցների տնօրենների և ուսուցիչների խոսքով՝ այս սարքավորումները երկար սպասված նվեր էին։ Դրանց շնորհիվ դպրոցներում կներդրվեն ուսուցման ինտերակտիվ մեթոդներ, իսկ նոր տեխնոլոգիաները թույլ կտան օգտվել առցանց կրթական հարթակներից և ուսումնական ծրագրերից, այդ թվում՝ «Աշխարհացույց» կրթական ծրագրից։ Ուսումնական նյութը կդառնա ավելի տեսանելի ու ներգրավող, ինչը կնպաստի աշակերտների գիտելիքների ավելի լավ յուրացմանը։
Ծրագրի արդյունքներից կօգտվի շուրջ 2000 աշակերտ։
